لاہور (آئی آر کے نیوز): پاکستان تحریک انصاف (پی ٹی آئی) نے 9 مئی کے مقدمات میں رہنماؤں کو سنائی گئی سزاؤں کے بعد ضمنی انتخابات کے بائیکاٹ کا حتمی فیصلہ کر لیا ہے۔ پارٹی قیادت کی جانب سے تمام امیدواروں کو کاغذات نامزدگی واپس لینے کی ہدایت جاری کر دی گئی ہے۔
میڈیا ذرائع کے مطابق پی ٹی آئی کسی بھی ضمنی انتخاب میں حصہ نہیں لے گی، تاہم لاہور کے حلقہ این اے 129 میں انتخاب لڑنے کا امکان ظاہر کیا جا رہا ہے، جہاں یہ نشست سینئر سیاستدان میاں اظہر کے انتقال کے باعث خالی ہوئی تھی۔
دوسری جانب، الیکشن کمیشن نے این اے 129 لاہور سے کاغذات نامزدگی جمع کروانے والے امیدواروں کی عبوری فہرست جاری کر دی ہے۔ فہرست کے مطابق کل 27 امیدواروں نے اپنے کاغذات جمع کروائے ہیں۔
عبوری فہرست میں پی ٹی آئی کے رہنما حماد اظہر، اویس انجم اور میاں جمیل کے نام شامل ہیں، جبکہ مسلم لیگ (ن) کے رہنماؤں رانا مشہود اور حافظ میاں محمد نعمان، اور پیپلز پارٹی سے حبیب جالب کی صاحبزادی طاہرہ جالب اور آصف ناگرہ نے بھی کاغذات جمع کرائے ہیں۔
الیکشن کمیشن کے مطابق کاغذات کی جانچ پڑتال کا عمل 8 اگست سے شروع ہوگا، جبکہ این اے 129 لاہور میں ضمنی انتخاب 18 ستمبر کو منعقد کیا جائے گا۔
یاد رہے کہ پی ٹی آئی کی جانب سے پنجاب اسمبلی کی نشست پی پی 87 اور قومی اسمبلی کی نشست این اے 66 کے لیے بھی بعض رہنماؤں نے کاغذات نامزدگی جمع کروائے تھے، تاہم موجودہ فیصلے کے بعد ان حلقوں میں بھی پارٹی کی جانب سے انتخاب نہ لڑنے کا امکان ہے۔