اسلام آباد (آئی آر کے نیوز): حکومت نے چینی کی بڑھتی ہوئی قیمتوں اور ممکنہ قلت کے پیش نظر درآمد کا ایک اور ٹینڈر جاری کر دیا ہے۔ ٹریڈنگ کارپوریشن آف پاکستان (ٹی سی پی) کے مطابق ایک لاکھ میٹرک ٹن چینی درآمد کرنے کا ٹینڈر جاری کیا گیا ہے، جسے 11 اگست کو کھولا جائے گا۔
چند روز قبل حکومت نے دو لاکھ میٹرک ٹن چینی درآمد کرنے کا حکم دیا تھا، تاکہ مارکیٹ میں استحکام پیدا کیا جا سکے۔ تاہم ملک کے مختلف حصوں میں چینی اب بھی سرکاری نرخ پر دستیاب نہیں، جس کے باعث عوام کو مشکلات کا سامنا ہے۔
لاہور کے مختلف علاقوں میں چینی دکانوں سے غائب ہو چکی ہے، جبکہ دکانداروں نے گُڑ اور شکر کی قیمتوں میں بھی اضافہ کر دیا ہے۔
دوسری جانب کوئٹہ میں چینی کی قیمت میں 7 روپے فی کلو کمی واقع ہوئی ہے، جس کے بعد مارکیٹ میں چینی 178 روپے فی کلو میں دستیاب ہے، جبکہ ضلعی انتظامیہ نے چینی کی سرکاری قیمت 177 روپے فی کلو مقرر کر رکھی ہے۔
حکام کے مطابق چینی کی درآمد سے طلب اور رسد میں توازن قائم کرنے میں مدد ملے گی، تاہم مارکیٹ میں فوری ریلیف کی صورتحال اب تک واضح نہیں ہو سکی۔ تجزیہ کاروں کا کہنا ہے کہ جب تک چینی سرکاری نرخ پر بازاروں میں بآسانی دستیاب نہیں ہوتی، حکومت کے اقدامات کا اثر عوام تک محدود رہے گا۔