نئی دہلی (انٹرنیشنل ڈیسک): بھارتی وزیراعظم نریندر مودی اگلے ماہ امریکہ کے ممکنہ دورے کے دوران صدر ڈونلڈ ٹرمپ سے ملاقات کر سکتے ہیں۔ یہ ملاقات اقوام متحدہ کی جنرل اسمبلی کے سالانہ اجلاس کے موقع پر متوقع ہے۔ بھارتی اخبار انڈین ایکسپریس نے حکومتی ذرائع کے حوالے سے یہ دعویٰ کیا ہے۔
رپورٹ کے مطابق مودی کا دورہ بنیادی طور پر نیویارک میں اقوام متحدہ کی جنرل اسمبلی میں شرکت کے لیے ہوگا، تاہم اس موقع پر صدر ٹرمپ سے ممکنہ ملاقات کا بھی امکان ہے، جس میں دونوں رہنما دو طرفہ تجارتی تعلقات اور حالیہ ٹیرف تنازعات پر بات چیت کر سکتے ہیں۔
بھارتی وزارتِ خارجہ نے اس خبر پر تاحال کوئی باضابطہ ردعمل نہیں دیا، تاہم ایک سرکاری اہلکار نے بتایا کہ مودی کی شرکت سے متعلق ابھی کوئی حتمی فیصلہ نہیں ہوا، اگرچہ 26 ستمبر کو جنرل اسمبلی کے اجلاس میں ان کا نام مقررہ فہرست میں شامل ہے۔ اہلکار کے مطابق یہ فہرست عمومی طور پر تبدیل بھی ہو سکتی ہے۔
اقوام متحدہ کی جنرل اسمبلی کا اجلاس 9 ستمبر سے شروع ہوگا، جبکہ عالمی رہنماؤں کا سالانہ مباحثہ 23 سے 29 ستمبر کے دوران منعقد ہوگا۔
اخباری رپورٹ کے مطابق اس ممکنہ ملاقات کی خاص اہمیت اس وقت بڑھ گئی ہے جب حالیہ دنوں میں امریکہ اور بھارت کے درمیان تجارتی تعلقات میں تناؤ پیدا ہوا ہے۔ صدر ٹرمپ نے بھارتی مصنوعات پر 25 فیصد اضافی ٹیرف عائد کرنے کا اعلان کیا تھا، جسے روسی تیل کی خریداری جاری رکھنے پر بھارت کے لیے ایک سزا قرار دیا گیا۔
اس اقدام کے بعد بھارتی مصنوعات پر مجموعی امریکی ٹیرف 50 فیصد تک پہنچ گیا ہے، جو کہ امریکہ کی جانب سے کسی بھی تجارتی شراکت دار پر عائد کیے گئے بلند ترین نرخوں میں سے ایک ہے۔
واضح رہے کہ واشنگٹن اور نئی دہلی کے درمیان تجارتی مذاکرات پانچ مرحلوں کے بعد اس وقت تعطل کا شکار ہو گئے جب بھارت نے روسی تیل کی خریداری بند کرنے اور اپنے زرعی و ڈیری شعبے کو کھولنے سے انکار کر دیا تھا۔
دوسری جانب امریکی وزیر خزانہ اسکاٹ بیسنٹ نے حالیہ بیان میں کہا ہے کہ امریکہ کے کئی تجارتی معاہدے، جن میں بھارت اور سوئٹزرلینڈ کے ساتھ مذاکرات بھی شامل ہیں، جلد مکمل ہونے کی توقع ہے۔ ان کا کہنا تھا کہ وہ امید رکھتے ہیں کہ اکتوبر کے اختتام تک ٹرمپ انتظامیہ یہ معاہدے حتمی شکل دے دے گی۔
اب دیکھنا یہ ہے کہ آیا مودی جنرل اسمبلی کے اجلاس میں شرکت کرتے ہیں یا نہیں، اور اگر وہ نیویارک پہنچے تو کیا صدر ٹرمپ سے ملاقات ممکن ہو پاتی ہے یا نہیں۔