لاہور (آئی آر کے نیوز): ایشیا کپ 2025 سے قبل پاکستان کرکٹ ٹیم میں ردوبدل کا امکان ظاہر کیا جا رہا ہے۔ ذرائع کے مطابق یو اے ای میں شیڈول تین ملکی ٹرائنگولر سیریز کے لیے فاسٹ بولر سلمان مرزا اور آل راؤنڈر احمد دانیال کی قومی اسکواڈ میں واپسی کا قوی امکان ہے، جبکہ سینئر پیسرز شاہین شاہ آفریدی اور حارث رؤف کو ورک لوڈ مینجمنٹ کے تحت آرام دیا جا سکتا ہے۔ فخر زمان، جو حالیہ دنوں میں ہیمسٹرنگ انجری کا شکار رہے، ان کی بھی ایشیا کپ تک مکمل فٹ ہونے کی توقع ظاہر کی جا رہی ہے۔ امکان ہے کہ اگلے ہفتے ممکنہ کھلاڑیوں کا باضابطہ اعلان کیا جائے گا جبکہ ٹریننگ کیمپ لاہور میں لگانے کی تجویز زیر غور ہے۔
ذرائع کے مطابق پاکستان کرکٹ ٹیم ایشیا کپ سے قبل یو اے ای میں افغانستان اور میزبان ملک کے خلاف مختصر فارمیٹ کی ٹرائنگولر سیریز کھیلے گی۔ اس وقت قومی ٹیم ویسٹ انڈیز میں ون ڈے سیریز میں مصروف ہے اور وطن واپسی کے بعد ہی ٹرائنگولر سیریز اور ایشیا کپ کے لیے حتمی اسکواڈ کا اعلان متوقع ہے۔ سلیکٹرز کی جانب سے 15 کے بجائے 16 رکنی اسکواڈ منتخب کرنے پر غور کیا جا رہا ہے تاکہ کھلاڑیوں کو متبادل کے ساتھ میدان میں اتارا جا سکے۔ شاداب خان، جو سرجری کے بعد ری ہیبلیٹیشن کے مرحلے میں ہیں، اس سیریز اور ایشیا کپ کا حصہ نہیں ہوں گے۔
فخر زمان جلد ہی نیشنل کرکٹ اکیڈمی میں رپورٹ کریں گے جہاں پی سی بی کا میڈیکل پینل ان کی انجری کا معائنہ کرے گا۔ ذرائع کے مطابق ان کی انجری زیادہ سنگین نوعیت کی نہیں اور وہ معمول کے ری ہیب سے مکمل صحت یاب ہو سکتے ہیں۔ سلیکٹرز کو امید ہے کہ فخر زمان تین ملکی سیریز اور ایشیا کپ کے لیے دستیاب ہوں گے، تاہم ان کی حتمی شمولیت میڈیکل کلیئرنس سے مشروط ہے۔ بولنگ کے شعبے کو مزید مضبوط بنانے کے لیے سلمان مرزا کو اسکواڈ کا حصہ بنانے کا فیصلہ کیا گیا ہے، جس کے پیش نظر ان کا نام آسٹریلیا کے ڈارون جانے والے اسکواڈ سے واپس لے لیا گیا ہے۔ سلمان مرزا نے پی ایس ایل اور بعد ازاں بنگلہ دیش کے خلاف سیریز میں شاندار کارکردگی دکھا کر سلیکٹرز کا اعتماد حاصل کیا۔
تین ملکی ٹورنامنٹ 29 اگست سے شارجہ میں شروع ہوگا، جہاں پاکستان اپنا پہلا میچ افغانستان کے خلاف کھیلے گا۔ ہر ٹیم دو مرتبہ ایک دوسرے کے خلاف میدان میں اترے گی، جبکہ ٹاپ دو ٹیمیں 7 ستمبر کو فائنل میں آمنے سامنے ہوں گی۔ اس سیریز اور ایشیا کپ کی تیاریوں کے لیے تربیتی کیمپ 20 اگست سے لاہور میں لگائے جانے کا امکان ہے، تاہم حتمی فیصلہ ویسٹ انڈیز سے ٹیم کی واپسی کے بعد ہیڈ کوچ اور کپتان سلمان آغا کی مشاورت سے کیا جائے گا۔
ایشیا کپ کا باقاعدہ آغاز 9 ستمبر سے ہوگا، جس میں پاکستان اور بھارت 14 ستمبر کو ایک دوسرے کے خلاف میدان میں اتریں گے۔ دونوں روایتی حریف ایک ہی گروپ میں شامل ہیں، جس کے باعث اس مقابلے کو کرکٹ شائقین بھرپور دلچسپی سے دیکھ رہے ہیں۔ ٹیم مینجمنٹ اور سلیکشن کمیٹی ان اہم مقابلوں کے لیے مکمل اور فٹ اسکواڈ میدان میں اتارنے کے لیے کوشاں ہے۔