لاہور (آئی آر کے نیوز): پاکستان تحریک انصاف (پی ٹی آئی) نے دعویٰ کیا ہے کہ لاہور سے ان کے 300 سے زائد کارکنوں کو حراست میں لے لیا گیا ہے۔ پارٹی قیادت کے مطابق یومِ سیاہ کے موقع پر آج شہر بھر میں بھرپور احتجاج کیا جائے گا۔
تفصیلات کے مطابق پی ٹی آئی لاہور کے صدر امتیاز شیخ نے نجی ٹی وی چینل جیو نیوز سے گفتگو کرتے ہوئے کہا کہ لاہور کے تمام حلقوں میں احتجاج کی تیاریاں مکمل ہیں۔ ان کے مطابق آج کا دن یومِ سیاہ کے طور پر منایا جا رہا ہے، اور تمام ٹکٹ ہولڈرز و کارکنوں کو اپنے اپنے حلقوں میں احتجاج کی ہدایت دی گئی تھی۔
انہوں نے الزام عائد کیا کہ لاہور پولیس پی ٹی آئی رہنماؤں اور کارکنان کے گھروں پر چھاپے مار رہی ہے تاکہ احتجاج کو روکا جا سکے۔
پارٹی ذرائع کا کہنا ہے کہ پولیس کارروائیوں کے دوران اب تک تقریباً 300 کارکنوں کو گرفتار کیا جا چکا ہے۔ ذرائع نے مزید انکشاف کیا کہ گزشتہ روز پی ٹی آئی کارکن چھاپوں کے ڈر سے پنجاب اسمبلی کے احاطے سے باہر نہیں نکل رہے تھے۔
تحریک انصاف کا کہنا ہے کہ حکومت احتجاجی آواز کو دبانے کی کوشش کر رہی ہے لیکن عوامی ردعمل کو روکا نہیں جا سکتا۔ دوسری جانب ضلعی انتظامیہ اور پولیس کی جانب سے گرفتاریوں یا چھاپوں پر کوئی باضابطہ بیان تاحال جاری نہیں کیا گیا۔