دبئی (آئی آر کے نیوز): پاکستان کے سابق کپتان اور فاسٹ بولر وسیم اکرم نے ایشیا کپ 2025 میں روایتی حریف بھارت کے خلاف ہونے والے بڑے ٹاکرے سے قبل اپنی فیورٹ ٹیم بتادی۔
سوئنگ کے سلطان وسیم اکرم نے اپنے بیان میں کہا کہ پاکستان بمقابلہ بھارت میچ 14 ستمبر کو کھیلا جائے گا اور ہمیشہ کی طرح انتہائی سنسنی خیز ہوگا تاہم جو ٹیم دباؤ کو بہتر انداز میں سنبھالے گی وہی کامیاب رہے گی۔
وسیم اکرم نے پاکستان اور بھارت کے میچ میں بھارتی ٹیم کو مقابلہ جیتنے کے لیے پسندیدہ قرار دیا، انہوں نے اس کی وضاحت کرتے ہوئے کہا کہ کرکٹ کے میدان میں فیورٹ ہونے سے زیادہ اصل امتحان دباؤ میں کھیلنے کا ہوتا ہے اور پاکستانی ٹیم بھی بڑے مقابلوں میں شاندار کارکردگی دکھانے کی صلاحیت رکھتی ہے۔
وسیم اکرم نے شائقین کو نظم و ضبط کا مظاہرہ کرنے کی تلقین کرتے ہوئے کہا کہ اگر بھارتی اپنے آپ کو محبِ وطن سمجھتے ہیں اور چاہتے ہیں کہ ان کی ٹیم جیتے تو پاکستانی عوام بھی دل و جان سے اپنی ٹیم کے ساتھ کھڑے ہیں۔
انہوں نے کہا کہ پاکستانی بھی جیت کی خواہش رکھتے ہیں لیکن سب سے ضروری بات یہ ہے کہ دونوں ملکوں کے شائقین کھیل کو کھیل کی حد تک رکھیں تاکہ یہ میچ سب کے لیے دلچسپ اور یادگار ثابت ہو۔
وسیم اکرم نے اس بات پر زور دیا کہ کھلاڑیوں کے ساتھ ساتھ شائقین کو بھی کھیل کی اصل روح کو برقرار رکھنا چاہیے۔
انہوں نے مزید کہا کہ دونوں ملکوں کے کرکٹ شائقین کو نظم و ضبط اور برداشت کا مظاہرہ کرنا ہوگا تاکہ دنیا بھر میں کرکٹ کا مثبت پیغام جائے۔
واضح رہے کہ پاکستان اور بھارت کی ٹیمیں 14 ستمبر کو دبئی میں آمنے سامنے ہوں گی۔