لاہور (آئی آر کے نیوز): پاکستان کرکٹ بورڈ نے اوپننگ بیٹر فخر زمان کی انجری کے باعث سابق کپتان بابر اعظم کی ٹی ٹوئنٹی اسکواڈ میں واپسی پر سنجیدگی سے غور شروع کر دیا ہے۔ ذرائع کے مطابق بابر اعظم کی شمولیت آئندہ سہ فریقی سیریز اور ایشیا کپ 2025 کے لیے متوقع ہے۔
فخر زمان کو ویسٹ انڈیز کے خلاف جاری ٹی ٹوئنٹی سیریز کے دوران چوٹ لگ گئی تھی، جس کے بعد وہ نہ صرف بقیہ ٹی ٹوئنٹی میچز بلکہ ون ڈے سیریز سے بھی باہر ہو گئے ہیں۔ پی سی بی نے فخر زمان کو فوری طور پر نیشنل کرکٹ اکیڈمی لاہور رپورٹ کرنے کی ہدایت دی ہے، جہاں وہ بحالی کے عمل سے گزریں گے۔
ذرائع کا کہنا ہے کہ ایشیا کپ میں فخر زمان کی شرکت غیر یقینی ہے، جبکہ بورڈ ان کی انجری اور ری ہیب پر مسلسل نظر رکھے ہوئے ہے۔ متبادل کے طور پر بابر اعظم کی واپسی پر غور جاری ہے، تاہم اس کا حتمی فیصلہ ان کی ویسٹ انڈیز کے خلاف ون ڈے سیریز میں کارکردگی سے مشروط ہے۔
ذرائع کے مطابق اگر بابر اعظم سلیکٹرز کو اپنی فارم اور فٹنس سے متاثر کرنے میں کامیاب ہو جاتے ہیں تو وہ ٹی ٹوئنٹی اسکواڈ میں ایک مضبوط امیدوار بن سکتے ہیں۔ حال ہی میں بابر اعظم نے محمد رضوان اور نسیم شاہ کے ہمراہ چیئرمین پی سی بی محسن نقوی سے ملاقات بھی کی، جو دوسرے ٹی ٹوئنٹی میچ کے دوران ہوئی۔
ایشیا کپ 2025 کے لیے قومی اسکواڈ کا حتمی اعلان اگست کے دوسرے ہفتے میں متوقع ہے۔ ایشیا کپ کا آغاز 9 ستمبر کو گروپ بی کے پہلے میچ، افغانستان اور ہانگ کانگ کے درمیان مقابلے سے ہوگا۔ ٹورنامنٹ میں مجموعی طور پر آٹھ ٹیمیں شریک ہوں گی جنہیں دو گروپس میں تقسیم کیا گیا ہے۔
گروپ اے میں پاکستان، بھارت، یو اے ای اور عمان شامل ہیں، جب کہ گروپ بی میں بنگلہ دیش، افغانستان، سری لنکا اور ہانگ کانگ کو رکھا گیا ہے۔ پاکستان اپنا پہلا میچ 12 ستمبر کو عمان کے خلاف کھیلے گا، بھارت کے خلاف روایتی مقابلہ 14 ستمبر کو ہوگا، جبکہ تیسرے گروپ میچ میں 17 ستمبر کو پاکستان کا سامنا یو اے ای سے ہوگا۔