اسلام آباد (آئی آر کے نیوز): اسلام آباد کی ضلعی انتظامیہ نے پاکستان تحریک انصاف (پی ٹی آئی) کی جانب سے 5 اگست کو ایف نائن پارک میں جلسہ کرنے کی درخواست مسترد کر دی ہے۔
سابق وزیرِ اعظم عمران خان کی گرفتاری کو دو سال مکمل ہونے پر پی ٹی آئی نے ملک گیر احتجاج کا اعلان کر رکھا ہے، جس کے تحت اسلام آباد میں جلسے کی اجازت مانگی گئی تھی۔
پی ٹی آئی رہنما عامر مغل کی جانب سے ضلعی انتظامیہ کو جلسے کی درخواست دی گئی تھی، تاہم سیکیورٹی خدشات کی بنیاد پر اسے مسترد کر دیا گیا۔ اسلام آباد پولیس کی اسپیشل برانچ کی رپورٹ میں کہا گیا ہے کہ پی ٹی آئی کی مقامی قیادت شہر کے مختلف علاقوں میں چھوٹی ریلیاں نکالنے کا منصوبہ رکھتی ہے، جن سے شہر کی مرکزی شاہراہیں بند ہونے کا خدشہ ہے۔
پولیس نے رپورٹ کی روشنی میں پی ٹی آئی رہنماؤں کے گھروں پر چھاپے مارنے کا سلسلہ بھی شروع کر دیا ہے، تاہم تاحال کوئی گرفتاری عمل میں نہیں آئی۔ راولپنڈی میں بھی پی ٹی آئی کی مقامی قیادت کے گھروں پر چھاپوں کی اطلاعات ہیں۔
ادھر پی ٹی آئی نے اسلام آباد میں جلسے کی اجازت نہ ملنے کے بعد خیبرپختونخوا میں احتجاجی مظاہروں کا لائحہ عمل جاری کر دیا ہے۔ پشاور ریجن کے تحت جاری اعلامیے کے مطابق پشاور اور خیبر کے اضلاع سے تعلق رکھنے والے کارکنان 5 اگست کو سہ پہر ساڑھے تین بجے حیات آباد ٹول پلازہ، رنگ روڈ سے قلعہ بالا حصار تک ریلی نکالیں گے، جس کی قیادت وزیراعلیٰ خیبرپختونخوا علی امین گنڈا پور کریں گے۔
صوابی، مردان اور چارسدہ سے تعلق رکھنے والے مظاہرین سہ پہر ساڑھے تین بجے امبار انٹرچینج صوابی پر جمع ہوں گے اور عشاء کی نماز تک احتجاج جاری رکھیں گے، جبکہ نوشہرہ اور مہمند کے کارکن خیر آباد کے مقام پر احتجاج کریں گے۔
پی ٹی آئی پشاور ریجن کی ضلعی تنظیموں کو ہدایت کی گئی ہے کہ تمام ارکانِ اسمبلی اور ٹکٹ ہولڈرز اپنے زیرِ نگرانی ہونے والے احتجاج کی ویڈیوز بنا کر ضلعی قیادت کو فراہم کریں تاکہ احتجاج کی تفصیلات ریکارڈ میں لائی جا سکیں۔