لاہور (آئی آر کے نیوز): لاہور کی انسداد دہشت گردی عدالت نے سانحہ 9 مئی سے متعلق دو اہم مقدمات کا فیصلہ سناتے ہوئے شاہ محمود قریشی کو بری کر دیا جبکہ ڈاکٹر یاسمین راشد، اعجاز چوہدری، محمود الرشید اور عمر سرفراز چیمہ سمیت دیگر ملزمان کو 10، 10 سال قید کی سزائیں سنا دیں۔
انسداد دہشت گردی عدالت کے جج نے یہ فیصلہ کوٹ لکھپت جیل میں سنایا، جہاں مقدمات کی سماعت جیل ٹرائل کے طور پر ہو رہی تھی۔ عدالت نے جناح ہاؤس پر حملے اور دیگر پُرتشدد واقعات سے متعلق کیس میں عائشہ بھٹہ کو بھی 10 سال قید کی سزا سنائی، انہیں جناح ہاؤس کے قریب گاڑیاں جلانے کے الزام میں سزا دی گئی۔
دوسری جانب تھانہ شادمان کو آگ لگانے سے متعلق کیس میں عدالت نے 12 ملزمان کو بری کر دیا۔ بری ہونے والوں میں سہیل خان، اویس، رفیع الدین، فرید خان، سلمان احمد، عبدالقادر، فیضان، طیب، سلطان، شاہد بیگ، ماجد علی اور بخت روان شامل ہیں۔
عدالت نے مزید دو خواتین رہنماؤں عالیہ حمزہ ملک اور صنم جاوید کو 5، 5 سال قید کی سزا سنائی۔ ان پر 9 مئی کو جلاؤ گھیراؤ، اشتعال انگیزی اور عوامی املاک کو نقصان پہنچانے کے الزامات عائد تھے۔
یاد رہے کہ کچھ روز قبل بھی انسداد دہشت گردی عدالت کی جانب سے عمر ایوب، شبلی فراز سمیت متعدد دیگر رہنماؤں کو 9 مئی کے پُرتشدد واقعات میں سزائیں سنائی جا چکی ہیں۔ عدالت کی جانب سے ان مقدمات میں مسلسل فیصلے سنائے جا رہے ہیں، جنہیں اہم قانونی پیش رفت قرار دیا جا رہا ہے۔