اسلام آباد (آئی آر کے نیوز): ملک کے سیاسی منظرنامے میں ایک نئی جماعت کی شمولیت ہوئی ہے، الیکشن کمیشن آف پاکستان نے "بہاولپور عوامی حقوق پارٹی" کو باضابطہ طور پر رجسٹر کر لیا ہے۔
الیکشن کمیشن کی جانب سے جاری اعلامیے کے مطابق اس نئی سیاسی جماعت کی رجسٹریشن کا نوٹیفکیشن جاری کر دیا گیا ہے، جس کے بعد ملک میں رجسٹرڈ سیاسی جماعتوں کی مجموعی تعداد 167 ہو گئی ہے۔
اعلامیے کے مطابق بہاولپور عوامی حقوق پارٹی کے انٹرا پارٹی انتخابات کو بھی تسلیم کر لیا گیا ہے، جن کے تحت محمد سلمان مہتاب کو جماعت کا صدر منتخب کیا گیا ہے۔
پارٹی کی رجسٹریشن کے بعد جنوبی پنجاب، بالخصوص بہاولپور کے عوامی مسائل اور حقوق کے لیے ایک نئی سیاسی آواز سامنے آ گئی ہے، جو آئندہ عام انتخابات میں حصہ لینے کی اہل ہو گئی ہے۔
سیاسی تجزیہ کاروں کے مطابق یہ جماعت علاقائی سطح پر عوامی حمایت حاصل کرنے کی کوشش کرے گی اور اپنے منشور کے ذریعے مقامی مسائل کو اجاگر کرنے کا دعویٰ کرتی ہے۔
الیکشن کمیشن کی منظوری کے بعد "بہاولپور عوامی حقوق پارٹی" کو انتخابی عمل میں حصہ لینے کے لیے مکمل آئینی اور قانونی حیثیت حاصل ہو گئی ہے۔