اسلام آباد (آئی آر کے نیوز): اسلام آباد ہائی کورٹ کے نئے چیف جسٹس سردار سرفراز ڈوگر نے اپنے عہدے کا حلف اٹھا لیا۔ حلف برداری کی تقریب ایوانِ صدر میں منعقد ہوئی جہاں صدرِ مملکت آصف علی زرداری نے ان سے حلف لیا۔
تفصیلات کے مطابق تقریب میں اہم سیاسی اور قانونی شخصیات نے شرکت کی، جن میں وفاقی وزیر قانون اعظم نذیر تارڑ، وزیر داخلہ محسن نقوی، چیئرمین سینیٹ یوسف رضا گیلانی اور وزیراعلیٰ پنجاب مریم نواز شامل تھے۔ سینئر وکلا کی بڑی تعداد بھی اس موقع پر موجود تھی۔
اس سے قبل سندھ ہائی کورٹ اور پشاور ہائی کورٹ کے نئے چیف جسٹس صاحبان بھی اپنے عہدوں کا حلف اٹھا چکے ہیں۔ کراچی میں گورنر سندھ کامران ٹیسوری نے جسٹس محمد جنید غفار سے حلف لیا، جب کہ پشاور میں گورنر خیبرپختونخوا فیصل کریم کنڈی نے جسٹس ایس ایم عتیق شاہ سے حلف لیا۔
واضح رہے کہ یکم جولائی کو چیف جسٹس آف پاکستان جسٹس یحییٰ آفریدی کی زیر صدارت جوڈیشل کمیشن کے اجلاس میں چاروں ہائی کورٹس کے نئے چیف جسٹسز کی تقرری کی منظوری دی گئی تھی۔ ان میں سردار سرفراز ڈوگر کو اسلام آباد ہائی کورٹ، جنید غفار کو سندھ ہائی کورٹ، عتیق شاہ کو پشاور ہائی کورٹ، اور روزی خان کو بلوچستان ہائی کورٹ کا چیف جسٹس مقرر کیا گیا تھا۔