امریکی صدر ڈونلڈ ٹرمپ کے سینیئر مشیر اور ٹیسلا کے سی ای او ایلون مسک نے نیٹو سے امریکی انخلا کی حمایت کرتے ہوئے کہا کہ "امریکا کے لیے یورپ کا دفاع کرنے کا کوئی جواز نہیں!"۔
امریکی میڈیا کے مطابق ایکس اکاؤنٹ پر ٹویٹ کرتے ہوئے ایلون مسک نے کہا
کہ امریکا کو نیٹو سے نکل جانا چاہیئے۔ یاد
رہے کہ انہوں نے یہ بات ایک پوسٹ کے جواب میں کہی، جس میں کہا گیا تھا کہ "اب
امریکا کو نیٹو سے نکل جانا چاہیے!"۔ اس پر مسک نے جواب دیا: "ہمیں
واقعی ایسا کرنا چاہیے۔"
یہاں یہ واضح رہے کہ یہ بیان ایسے وقت میں سامنے آیا ہے جب نیٹو اپنی
76 ویں سالگرہ منانے والا ہے، مگر اس کا مستقبل غیر یقینی صورتحال سے دوچار ہے۔
امریکی صدر ٹرمپ نے کئی بار یورپی یونین پر تجارتی محصولات عائد کرنے کی دھمکیاں
دی ہیں اور یوکرین جنگ کے معاملے پر ان کے روس کے ساتھ نرم رویے نے یورپی حکام میں
تشویش پیدا کردی ہے۔
یورپی کمیشن کی صدر ارسلا وان ڈیر لیئن نے ٹرمپ کی دھمکیوں کے بعد کہا
کہ یورپ کے لیے یہ "ویک اپ کال" ہے اور اب وقت آ گیا ہے کہ یورپ اپنے
دفاع کے لیے خود اقدامات کرے۔
یاد رہے کہ یورپی یونین نے حالیہ اجلاس میں 800 بلین یورو کے دفاعی
بجٹ پر اتفاق کیا ہے تاکہ خطے کی سلامتی کو مستحکم کیا جا سکے۔
ٹرمپ کی پالیسیوں کے باعث یورپی حکام اس سوال پر غور کر رہے ہیں کہ
آیا امریکا کے بغیر یورپ اپنی دفاعی پالیسی کو خودمختار بنا سکتا ہے؟ یورپی یونین
کے مطابق تمام اتحادیوں کو اپنی ذمہ داریاں پوری کرنی ہوں گی اور نیٹو کے مستقبل
پر نظر ثانی کا وقت آ چکا ہے۔