بابر اعظم کے والد سابق کرکٹرز پر برس پڑے

 

قومی کرکٹ ٹیم کے سابق کپتان بابر اعظم کے والد اعظم صدیق بابرکی بری فارم کے بعد سابق کرکٹرز کی بیٹے کے خلاف کڑی تنقید پر ان کے حق میں کھل کر سامنے آگئے۔

رپورٹس کے مطابق اعظم صدیق نے سوشل میڈیا پر جاری بیان میں کہا کہ" آئی سی سی ٹی ٹوئنٹی ٹیم آف دی ائیر کے رکن اور کیپ ملنے کے بعد بابر اعظم ڈراپ ہوئے، بابر اعظم نیشنل ٹی ٹوئنٹی اور پی ایس ایل میں پرفارم کر کے دوبارہ واپس آجائے گا"

اعظم صدیق نے سابق کرکٹرز کو آڑے ہاتھوں لیتے ہوئے کہا کہ وہ بابر کے متعلق اپنے الفاظ کا چناؤ ٹھیک کریں ورنہ اگر انہوں نے پلٹ کر جواب دیا تو سابق کرکڑز کسی کو منہ دکھانے نے قابل نہیں رہیں گے۔

ان کا کہنا تھا لوگ کہتے ہیں کہ میں زیادہ بولتا ہوں اور بابر کا دفاع کرتا ہوں۔ بات صرف اتنی ہے کہ میں بابر کا پہلا اور آخری کوچ ہوں، میں بابر اعظم کا ترجمان اور مینٹور ہوں، میں سب سے زیادہ خیرخواہ باپ ہوں۔ اور اگر کوئی بابر پر ناحق تنقید کرے گا تو میں سب سے پہلے اس کو منہ توڑ جواب دوں گا۔

اعظم صدیق کا کہنا تھا جو چیخ و پکار کر رہے ہیں ان کی اپنے دور میں کیا کارکردگی رہی ہے، پی سی بی کی ویب سائٹ ایک بار دیکھ لیا کریں، عقل مندوں کے لیے اشارہ کافی ہے۔

خیال رہے کہ بابر اعظم کو آئی سی سی چیمپئنز ٹرافی اور اس سے قبل نیوزی لینڈ اور آسٹریلیا کے خلاف سیریز میں بری فارم کی وجہ سے شدید تنقید کا نشانہ بنایا جا رہا ہے۔