اسلام آباد (آئی آر کے نیوز): سینئر صحافی انصار عباسی نے دعویٰ کیا ہے کہ ملک ریاض نے عمران خان کو محسن نقوی پر بھروسہ کرنے کو کہا تھا۔
تفصیلات کے مطابق انصار عباسی نے جنگ اخبار اور دی نیوز میں لکھی گئی اپنی رپورٹ میں دعویٰ کیا کہ: فی الوقت پاکستان سے باہر مقیم ایک اہم پراپرٹی ٹائیکون نے مبینہ طور پر جیل میں بند پی ٹی آئی کے بانی چیئرمین عمران خان کو ایک پیغام بھیج کر وزیر داخلہ محسن نقوی پر بھروسہ کرنے کی درخواست کی تھی۔
رپورٹ میں دعویٰ کیا گیا تھا کہ باخبر ذرائع کے مطابق ٹائیکون کا پیغام بشریٰ بی بی کو بھی پہنچایا گیا تھا۔ عمران خان اور بشریٰ بی بی دونوں ہی جانتے ہیں کہ ملٹری اسٹیبلشمنٹ سے قربت کے حوالے سے معروف محسن نقوی پس پردہ پی ٹی آئی رہنمائوں کو سہولت فراہم کرتے رہے ہیں۔ اس کے باوجود عمران خان محسن نقوی پر تنقید کر رہے ہیں، اور حالیہ سرکاری ملاقاتوں کے دوران محسن نقوی کیساتھ گرمجوشی کا اظہار کرنے پر خیبر پختونخوا کے وزیراعلیٰ علی امین گنڈا پور پر برہم ہیں۔
انصار عباسی اپنی رپورٹ میں لکھتے ہیں کہ ذرائع نے انکشاف کیا ہے کہ گزشتہ مہینوں کے دوران پس پردہ بات چیت میں مصروف رہنے والے علی امین گنڈاپور اور بیریسٹر گوہر پی ٹی آئی رہنمائوں کی مدد کے معاملے میں محسن نقوی کے کردار سے واقف ہیں۔ ان رہنمائوں نے مبینہ طور پر عمران خان کو محسن نقوی کی مثبت کردار سے آگاہ کیا تھا لیکن عمران خان بظاہر اپنے موقف سے پیچھے ہٹنے کو تیار نہیں تھے۔
جنگ اخبار میں لکھی گئی رپورٹ میں مزید دعویٰ کیا گیا کہ پی ٹی آئی کے سینئر رہنما محسن نقوی کے ساتھ گنڈاپور اور بیرسٹر گوہر کے تجربے بالخصوص غیر رسمی سیاسی مذاکرات میں سہولت کاری کے بارے میں بھی واقف ہیں، اگرچہ یہ مذاکرات تاحال بے نتیجہ رہے ہیں۔