پشاور (آئی آر کے نیوز): پاکستان تحریک انصاف (پی ٹی آئی) کے بانی اور سابق وزیر اعظم عمران خان کی اہلیہ بشریٰ بی بی نے مشعال یوسفزئی کو ترجمان کے عہدے سے ہٹا دیا، جبکہ چار نئے فوکل پرسن بھی مقرر کر دیے۔
اس بات کی تصدیق تب ہوئی جب اڈیالہ جیل کے باہر میڈیا سے گفتگو میں عمران خان کے وکیل تابش فاروق نے کہا کہ آج ہونے والی ملاقات میں بشریٰ بی بی نے مشعال یوسفزئی کو فوکل پرسن کے عہدے سے ہٹا کر اپنے چار نئے فوکل پرسن مقرر کیے ہیں۔
وکیل تابش فاروق نے کہا کہ ملاقات میں عمران خان اور بشری بی بی کے علاوہ پارٹی لیڈر شپ موجود تھی، بشریٰ بی بی نے خود کہا کہ مشعال یوسفزئی اب ان کی ترجمانی نہیں کریں گی، مشال یوسف زئی کو عہدے سے ہٹانے کی تصدیق بعدازاں پارٹی سیکریٹری جنرل سلمان اکرم راجا نے بھی کی۔
جبکہ دوسری جانب، بشریٰ بی بی کے چار نئے فوکل پرسنز میں وکلا نعیم پنجوتھا، مبشر مقصود اعوان، خالد یوسف چوہدری اور رائے سلمان شامل ہیں۔
یہاں یہ بھی خیال رہے کہ بانی پاکستان تحریکِ انصاف (پی ٹی آئی) عمران خان نے پارٹی میں نئی تقرریاں کردی ہیں۔
جیو نیوز کی رپورٹ کے مطابق اڈیالہ جیل میں عمران خان سے پارٹی قیادت، سینیئر وکلا اور فیملی ممبران نے ملاقات کی۔
نئی تقرریوں کے فیصلے پارٹی قیادت، سینیئر وکلا اور فیملی ممبران کی موجودگی میں کیے گئے۔
رپورٹ میں بتایا گیا ہے کہ عمران خان نے وکیل فیصل چوہدری کو جیل معاملات پر قانونی معاونت سے روک دیا۔
عمران خان نے وکیل فیصل چوہدری کو جیل معاملات پر قانونی معاونت سے روک دیا اور جیل معاملات پر قانونی معاونت کیلئے وکیل ظہیر عباس چوہدری کو کام سونپ دیا۔
جبکہ دوسری جانب، عمران خان نے نیازاللہ نیازی کو اپنا ترجمان مقرر کردیا ہے۔