دبئی (اسپورٹس ڈیسک): پاکستان کرکٹ ٹیم نے ایشیا کپ فائنل کی میچ فیس 7 مئی کی شب بھارتی حملے میں شہید ہونے والے معصوم شہریوں کے نام کرنے کا اعلان کردیا۔
قومی ٹی 20 ٹیم کے کپتان سلمان علی آغا نے پوسٹ میچ پریس کانفرنس کے دوران اعلان کیا کہ پاکستان ٹیم فائنل کی میچ فیس بھارتی حملوں سے متاثرہ اپنے معصوم شہریوں اور بچوں کے نام کرتی ہے۔
پاکستان کرکٹ بورڈ نے بھی ایکس پر اس حوالے سے پوسٹ کی ہے، پوسٹ میں کہا گیا ہے کہ پاکستان کرکٹ ٹیم نے اپنے ایشیا کپ کے فائنل میچ کی فیس 7 مئی کے حملے میں شہید ہونے والے معصوم متاثرین کے نام کرنے کا اعلان کیا ہے، جس میں عام شہریوں سمیت بچے بھی جاں بحق ہوئے تھے، ہماری دلی دعائیں اور ہمدردیاں ان کے اہل خانہ کے ساتھ ہیں۔
یاد رہے کہ ایشیا کپ کے فائنل میں بھارت نے پاکستان کو 5 وکٹوں سے شکست دے دی تھی، قومی ٹیم عمدہ اوپننگ شراکت کے باوجود صرف 146 رنز بناکر آؤٹ ہوگئی تھی جبکہ بھارتی ٹیم نے 5 وکٹوں کے نقصان پر آخری اوور کی چوتھی گیند پر ہدف حاصل کرلیا تھا۔