اسلام آباد (آئی آر کے نیوز): ملک بھر میں خشک موسم کا راج برقرار ہے جبکہ درجہ حرارت میں بھی بتدریج اضافہ دیکھنے میں آ رہا ہے۔
ایسے میں محکمہ موسمیات نے پیشگوئی کی ہے کہ بارش برسانے والا سسٹم جلد پاکستان میں داخل ہوگا، جس سے موسم میں تبدیلی متوقع ہے۔
محکمہ موسمیات کے مطابق اتوار اور پیر کے روز لاہور سمیت پنجاب کے مختلف اضلاع میں بادل چھائے رہنے کا امکان ہے تاہم بارش کے امکانات کم ہیں۔
موسمیاتی ماہرین کا کہنا ہے کہ 12 مارچ سے بارشوں کا نیا سلسلہ پاکستان میں داخل ہوگا جو 12 اور 13 مارچ کو لاہور سمیت پنجاب کے کئی شہروں میں بارش برسانے کا سبب بن سکتا ہے اس متوقع بارش سے درجہ حرارت میں کمی آئے گی اور موسم خوشگوار ہو جائے گا۔
محکمہ موسمیات کے مطابق آج لاہور میں کم سے کم درجہ حرارت 17 ڈگری سینٹی گریڈ جبکہ زیادہ سے زیادہ 27 ڈگری سینٹی گریڈ تک رہنے کا امکان ہے۔
ماہرین کا کہنا ہے کہ بارش کے بعد درجہ حرارت میں مزید کمی آئے گی جس سے شہریوں کو موسم کی سختی سے کچھ ریلیف ملے گا۔
جبکہ لاہور سمیت پنجاب کے بیشتر علاقوں میں ان دنوں مطلع صاف اور موسم خشک ہے جس کی وجہ سے دن کے اوقات میں گرمی کی شدت میں اضافہ ہو رہا ہے۔