 "Imran Khan")
لاہور (آئی آر کے نیوز): بانی پاکستان تحریکِ انصاف (پی ٹی آئی) عمران خان کا نام میڈیا پرنشر نہ کرنے کیخلاف درخواست، پیمرا نے ترمیمی قانون جمع کروا دیا۔
تفصیلات کے مطابق لاہور ہائیکورٹ میں عمران خان کا نام میڈیا پر نشر نہ کرنے کے خلاف درخواست پر سماعت ہوئی۔
لاہور ہائیکورٹ کے جسٹس شمس محمود مرزا کی سربراہی میں 3 رکنی فل بینچ نے سماعت کی۔ عدالت نے درخواست گزاروں کے وکلاء کو ترمیمی قانون کے تحت دلائل کیلئے طلب کرلیا۔
جبکہ پیمرا کے وکیل نے پیمرا ترمیمی قانون عدالت میں جمع کرادیا۔ پیمرا کے وکیل نے موقف اختیار کیا کہ پیمرا خودمختار ادارہ ہے اس کے معاملات کو براہ راست عدالت میں چلینج نہیں کیا جا سکتا۔ دائردرخواستیں ترمیمی ایکٹ کی روشنی میں مسترد کی جائیں۔
عمران خان کے وکیل بیرسٹر احمد پنسوتہ نے دلائل میں کہا کہ پیمرا کی ہدایات پر عمران خان کا نام میڈیا پر نشر نہیں کیا جارہا ہے۔ عمران خان کا نام نشر نہ کیا جانا آئین کے تحت امتیازی سلوک ہے۔
بعد ازاں، عدالت نے سماعت غیرمعینہ مدت تک ملتوی کردی۔