امریکی محکمہ خارجہ کا عمران خان سے متعلق سوال کا جواب دینے سے صاف انکار

امریکا نے بانی پی ٹی آئی عمران خان سے متعلق سوال پرکسی قسم کا ردعمل دینے سے انکار کر دیا۔

تفصیلات کے مطابق بدھ کو ترجمان امریکی محکمہ خارجہ ٹیمی بروس سے میڈیا بریفنگ کے  دوران ایک پاکستانی صحافی نے سابق وزیر اعظم پاکستان اور تحریک انصاف کے بانی عمران خان سے متعلق سوال کیا۔

تاہم امریکی محکمہ خارجہ کی ترجمان نے عمران خان سے متعلق سوال پر ردعمل دینے سے انکار کر دیا۔

 امریکی محکمہ خارجہ کی ترجمان ٹیمی بروس نے کہا کہ کسی دوسرے ملک کے اندرونی معاملات پربات نہیں کی جائے گی، چاہیں تو وائٹ ہاؤس سے بھی پوچھ لیں۔

ٹیمی بروس نے کہا کہ ٹرمپ اور وزیرخارجہ نے واضح کیا ہے کہ ہمیں کرہ ارض کی پرواہ ہے،امریکا کو اپنے پڑوسیوں کی پرواہ ہے، ہمیں اس بات کی فکر ہے کہ دنیا میں کیا ہو رہا ہے۔

یاد رہے کہ اس سے قبل  امریکی محکمہ خارجہ کی ترجمان ٹیمی بروس نے عمران خان کے متعلق پوچھے گئے سوال کو یکسر نظر انداز کردیا تھا اور پاکستانی صحافی کی جانب سے پوچھے گئے سوال کے صرف دوسرے حصے کا جواب دیا تھا۔

یاد رہے کہ ٹیمی بروس سے صحافی نے اپنے سوال میں عمران خان کی رہائی کے حوالے سے بات کرتے ہوئے پوچھا تھا کہ " کیا صدر ٹرمپ عمران خان کی رہائی کے لئے پاکستانی حکومت سے بات کریں گے؟" جس کے جواب میں ترجمان امریکی محکمہ خارجہ نے سوال کے پہلے حصے کو مکمل نظر انداز کردیا تھا اورسوال کے صرف دوسرے نقطہ کے حوالے سے گفتگو کی تھی۔