اسلام آباد (آئی آر کے نیوز): عالمی بینک کے ایگزیکٹو ڈائریکٹرز کا وفد پاکستان پہنچ گیا، اعلیٰ حکام سے ملاقاتیں کرے گا۔
تفصیلات کے مطابق عالمی بنک کا اعلیٰ سطح کا وفد پاکستان پہنچ گیا جو وزیراعظم، وزیر خزانہ اور اعلیٰ حکام سمیت تاجر رہنماؤں، اساتذہ اور سول سوسائٹی کے نمائندوں کے ساتھ ملاقاتیں کرے گا۔
میڈیا رپورٹس میں بتایا گیا ہے کہ عالمی بینک کا وفد ایگزیکٹو ڈائریکٹرز پر مشتمل ہے جو صوبوں کا بھی دورہ کرے گا، عالمی بینک نےگزشتہ ماہ پاکستان کے لیے 10 سالہ کنٹری پارٹنرشپ فریم ورک (سی پی ایف) منظورکیا تھا اور 40 ارب ڈالرز دینے کا وعدہ کیا تھا۔
توسیعی فریم ورک کے تحت 6 کلیدی ترقیاتی شعبوں پر توجہ مرکوز کی جائے گی، سی پی ایف کا مقصد چائلڈ اسٹننگ کو کم کرنا، موسمیاتی تبدیلیوں کی روک تھام ہے۔
سی پی ایف کے تحت 6 کروڑ افراد کو صاف پانی اور صفائی کی سہولتوں کی فراہمی یقینی بنانا ہوگی، 3 کروڑ افراد کے لیے غذائی تحفظ کو مضبوط بنانا ہوگا جبکہ مانع حمل کی رسائی کو 3 کروڑ خواتین تک بڑھانا ہوگا۔
یہاں یہ بھی خیال رہے کہ عالمی بینک کے مخصوص اہداف میں ٹیکس ریونیو کو جی ڈی پی کے 15 فیصد سے زائد کرنا، قابل تجدید توانائی کی صلاحیت میں 10 گیگا واٹ کا اضافہ، ایک کروڑ 20 لاکھ طلبہ کو معیاری تعلیم کی فراہمی اور 50 کروڑ افراد کو صحت کی سہولتوں کی فراہمی بھی شامل ہے۔