پشاور: (آئی آر کے نیوز) خیبرپختونخواحکومت کی کارکردگی پر اپنے ہی پارٹی کے رہنماوں اورکارکنوں نے تنقید کردی۔
تفصیلات کے مطابق پشاور میں ترقیاتی کام نہ ہونے کےخلاف پاکستان تحریکِ انصاف (پی ٹی آئی) ضلعی تنظیم کا چند دن قبل ہونے والے اجلاس کا مشترکہ اعلامیہ جاری کردیا گیا۔
اجلاس کے اعلامیہ میں بتایا گیا کہ تیسری بار پی ٹی آئی کی حکومت ہے لیکن اب بھی پشاور شہر اہم مسائل سے دوچار ہے۔ پشاور شہر کے مختلف حلقوں میں ترقیاتی کاموں کو نظرانداز کیا جارہا ہے، شہر میں سیورج کا ںظام تباہ ہے بارشوں کے بعد شہر سیلاب کا منظر پیش کرتا ہے۔
اجلاس کے اعلامیہ میں اس بات پر بھی زور دیا گیا کہ ریئل اسٹیٹ کا کام ختم ہوچکا ہے، پشاور کا ترقیاتی فنڈ دوسرے اضلاع میں منتقل کیا جارہا ہے، سیف سٹی پراجیکٹ 2009 میں تجویز کیا گیا اب تک عمل درآمد نہ ہوسکا، مسائل کے حل پر فوری غور نہ کیا گیا تو احتجاج کا آپشن موجود ہے۔
اعلامیہ میں یہ بھی کہا گیا کہ پشاور کے کئی علاقے پینے کے صاف پانی سے محروم ہے، بیشتر علاقے سٹریٹ لائٹنگ سے محروم ہے، کاروباد کے موقع فراہم کئے جائیں۔