سلمان خان کیلیے پاکستان میں دلہن ڈھونڈ لی ہے، راکھی ساونت کا دعویٰ

معروف بھارتی اداکارہ راکھی ساونت نے پاکستانی دلہا ڈھونڈتے ڈھونڈتےاپنے منہ بولے بھائی کیلئے پاکستانی دلہن ڈھونڈ نکالی۔

میڈیا رپورٹس کے مطابق راکھی ساونت نے دعویٰ کیا ہے کہ انہوں نے اپنے منہ بولے بھائی سلمان خان کیلئے پاکستانی دلہن پسند کرلی ہے۔ یاد رہے کہ اداکار سلمان خان نے کئی مشکل مواقع پر راکھی ساونت کی مدد کرکے خود کو بھائی ثابت بھی کیا ہے۔

راکھی ساونت اور سلمان خان کے اس رشتے سے پوری انڈسٹری واقف ہے اور دونوں اس کا برملہ اظہار بھی کرتے رہتے ہیں۔ سلمان نے ہمیشہ راکھی کیلئے ایک نرم گوشہ رکھا ہے جس کی وجہ سے راکھی بھی ان کی بےپناہ عزت کرتی ہیں۔

تاہم شاید ہی کسی کو یہ بھی معلوم ہوگا کہ سلمان نے اپنے لیے دلہن ڈھونڈنے کا ٹاسک اپنی منہ بولی بہن راکھی ساونت کو دے رکھا ہے۔

راکھی ساونت نے اپنی ایک ویڈیو میں دعویٰ کیا ہے کہ میں نے اپنے منہ بولے بھائی سلمان خان کے لیے پاکستانی دلہن تلاش کرلی ہے۔

اداکارہ راکھی ساونت نے مزید کہا کہ میں نے پاکستان کی خوبصورت اداکارہ ہانیہ عامر کو سلمان خان کیلئے پسند کیا ہے۔

یاد رہے کہ وائرل ویڈیو میں راکھی ساونت نے سلمان خان کو مخاطب کرتے ہوئے کہا ہے کہ بھائی، میں نے بھابھی چن لی ہے اور وہ ہانیہ عامر ہیں۔

راکھی ساونت نے ہانیہ عامر کو بھی مخاطب کرتے ہوئے کہا کہ سلمان میرے بھائی ہیں اور آپ پاکستان سے میری بھابھی ہیں۔

سلمان خان اور ہانیہ عامر کی شادی کے ساتھ ساتھ راکھی ساونت نے ہانیہ عامر کو سلمان خان کے ساتھ فلم میں کام کرنے کی دعوت بھی دے ڈالی۔

راکھی ساونت کے اس بیان پر سلمان خان اور ہانیہ عامر کا کوئی ردعمل فی الحال سامنے نہیں آسکا، جب کہ سوشل میڈیا صارفین نے بھی اس بیان کو محض سستی شہرت کا ذریعہ قرار دیا۔

یاد رہے کہ راکھی ساونت اور ہانیہ عامر کے درمیان سوشل میڈیا پر ہلکہ پھلکی لفظوں کی جنگ بھی شروع ہوئی تھی۔