چائنا نیوز ایجنسی نے دعویٰ کرتے ہوئے بتایا ہے کہ چین نے امریکی صدر ڈونلڈ ٹرمپ کے غزہ پر قبضے کے منصوبے کو مسترد کرتے ہوئے مصری تجویز کی حمایت کا فیصلہ کیا ہے۔
تفصیلات کے مطابق غیر ملکی خبر رساں ادارے " انادولو"
نے دعویٰ کیا ہے کہ چین کے سالانہ قانون ساز اسمبلی کے اجلاس کے دوران ایک پریس
کانفرنس کرتے ہوئے چینی وزیر خارجہ وانگ ژی نے کہا ہے کہ "چین مصر اور دیگر
عرب ممالک کی جانب سے غزہ میں امن بحال کرنے کے لیے پیش کیے گئے منصوبے کی حمایت
کرتا ہے، غزہ فلسطینی عوام کا ہے اور یہ فلسطینی سرزمین کا ایک ناقابل تقسیم حصہ
ہے"
انہوں نے اپنی گفتگو میں زور دیا کہ فلسطینیوں سے زور زبردستی کرکے ان
کی حیثیت چھین لینے سے امن نہیں آئے گا، بلکہ اس سے انتشار اور بھی زیادہ بڑھے گا۔
وانگ نے بین الاقوامی برادری پر زور دیا کہ وہ مستقل جنگ بندی کے لیے
کوششیں کرے، انسانی امداد میں اضافہ کریں اور ’فلسطینیوں کے فلسطین پر حکومت کرنے‘
کے اصول کو برقرار رکھیں۔
انہوں نے فلسطینی ریاست کے قیام اور دو ریاستی حل کی حمایت کا اعادہ
کیا جو مشرق وسطیٰ کے تنازع کے حل کی بنیاد ہے۔
انہوں نے فلسطین اور اسرائیل کے درمیان امن کو فروغ دینے کے لیے عالمی
کوششوں پر زور دیتے ہوئے کہا کہ ’تمام فلسطینی دھڑوں کو اتحاد اور خود کو مضبوط
بنانے کے لئے بیجنگ اعلامیے پر عمل کرنے کی ضرورت ہے‘۔
انہوں نے کہا کہ چین مشرق وسطیٰ کے عوام کے لیے انصاف، امن اور ترقی
کے لیے بھرپور جدوجہد جاری رکھے گا۔
خبر رساں ادارے رائٹرز کے مطابق وانگ ژی نے کہا کہ اگر بڑی طاقتیں
واقعی غزہ کے عوام کی پرواہ کرتی ہیں تو انہیں غزہ میں جامع اور دیرپا جنگ بندی کو
فروغ دینا چاہیے اور انسانی امداد میں اضافہ کرنا چاہیے۔