اسلام آباد (آئی آر کے نیوز): سابق وزیر اعظم عمران خان کی بہن علیمہ خان نے دعویٰ کیا ہے کہ اُن کے بھائی نے پارٹی قیادت کو ’اسٹیبلشمنٹ‘ سے رابطہ کرنے سے روک دیا ہے، اور زور دیا ہے کہ اگر وہ واقعی مذاکرات میں دلچسپی رکھتے ہیں تو اُن سے براہِ راست رابطہ کریں۔
تفصیلات کے مطابق ان خیالات کا اظہار انہوں نے توشہ خانہ-ٹو کیس کی سماعت کے بعد اڈیالہ جیل کے باہر میڈیا سے گفتگو کرتے ہوئے کیا۔
انہوں نے کہا کہ عمران خان نے پارٹی رہنماؤں اور کارکنوں کو ہدایت دی ہے کہ وہ اسٹیبلشمنٹ سے رابطہ نہ کریں، اور اگر اسٹیبلشمنٹ بات کرنا چاہتی ہے تو براہِ راست اُن (عمران خان) سے بات کرے۔
توشہ خانہ-2 کیس پر تبصرہ کرتے ہوئے علیمہ خان نے کہا کہ پچھلے ہفتے مرکزی گواہ کی ساکھ ختم ہو گئی تھی، لیکن جج نے معاملہ ختم نہیں کیا۔
انہوں نے کہا کہ بریگیڈیئر احمد اور کرنل ریحان (عمران خان کے سابق فوجی سیکریٹریز) نے بھی تصدیق کی کہ تحائف کی دستاویزات مکمل تھیں، تو منطقی طور پر کیس ختم ہو چکا ہے، لیکن جج تفتیشی افسران کے بیانات ریکارڈ کر رہے ہیں، ہمیں پورا یقین ہے کہ یہ کیس آئندہ دو سے تین سماعتوں میں ختم ہو جائے گا۔
القادر ٹرسٹ کیس کے حوالے سے علیمہ خان نے نشاندہی کی کہ جسٹس سرفراز ڈوگر نے پچھلے 10 ماہ سے اس کی سماعت نہیں کی، بالآخر یہ کیس اس ماہ کی 25 تاریخ کو سنا جائے گا، اور ہمیں امید ہے کہ ضمانت مل جائے گی۔