اسلام آباد (آئی آر کے نیوز): پاک بھارت جنگ بندی کے اعلان کے بعد بحال کیے گئے فلائٹ آپریشن میں بیک لاگ کی وجہ سے منسوخ اور تاخیر کا شکار ہونے والی فلائٹس کی صورت حال بہتر ہونا شروع ہوگئی ہے۔
تفصیلات کے مطابق فلائٹ شیڈول میں بہتری آنا شروع ہوگئی ہے، 12 غیرملکی ایئر لائنز نے بھی پروازیں بحال کر دیں، فلائٹ شیڈول کے مطابق مخلتف ایئرپورٹس سے پروازوں کی منسوخی کم ہوکر 50 رہ گئی ہے، جو گزشتہ روز 150 تک جا پہنچی تھی۔
پاکستان ایوی ایشن اتھارٹی ( پی اے اے) کے ذرائع کے مطابق حج پروازوں کو معمول پر لانے کے لیے کوششیں جاری ہیں۔
آج اسلام آباد سے محض 23 ، لاہور سے 14 اور کراچی سے 15 پروازیں منسوخ کی گئی ہیں۔
پشاور کی 4 ، سیالکوٹ 2 اور فیصل آباد کی ایک پرواز منسوخ کی گئی ہے، جبکہ آپریشنل وجوہات کے باعث سیالکوٹ ایئرپورٹ کی شارجہ دمام اور کویت سے 3 پروازیں لاہور منتقل کی گئی ہیں۔
واضح رہے کہ گزشتہ ہفتے پاک بھارت کشیدگی کی وجہ سے بار بار فضائی آپریشن معطل اور بحال کیا جاتا رہا، پاکستان ایوی ایشن اتھارٹی (پی اے اے) کی جانب سے وقتاً فوقتاً نوٹم جاری کیے گئے تھے، جس کی وجہ سے ایئرلائنز کو مشکلات کا سامنا کرنا پڑا تھا، اور بعض ایئرلائنز نے اپنا آپریشن روک دیا تھا۔