میرے کتے نے مجھے گولی مارکر زخمی کردیا، امریکی شخص کا عجیب و غریب دعویٰ

امریکی شہری نے دعویٰ کیا ہے کہ اس کے پالتو کتے نے اسے گولی مار دی تھی جس سے وہ زخمی ہوگیا۔

تفصیلات کے مطابق امریکا کے علاقے میمفس، ٹینیسی سے تعلق رکھنے والے جیرالڈ کرک ووڈ نے ایک انتہائی حیران کن دعویٰ کرڈالا ہے۔ اس شخص کا کہنا ہے کہ وہ پیر کی صبح اپنے بیڈ روم میں اپنی دوست خاتون کے ساتھ آرام کررہے تھے جب ان کے پالتو  کتے اوریو نے بستر پر چھلانگ لگا دی۔

انہوں نے مزید بتایا کہ اوریو کمرے میں داخل ہونے کے لیے اتنا پرجوش تھا کہ مبینہ طور پر فرش پر پڑی بندوق پر اس کا پاؤں پڑا، اس کا پنجا بندوق کے ٹریگر میں پھنس گیا، جس سے بندوق سے گولی چل گئی۔

جس کےبعدد گولی چلنے سے جیرالڈ کرک ووڈ کی بائیں ران پر زخم آیا، پیرامیڈیکس نے جائے وقوعہ پر اس کا علاج کیا ، تاہم اسے بعد میں علاج کے لیے اسپتال منتقل کردیا گیا۔

پیرامیڈیکس کے پہنچنے سے پہلےکرک ووڈ کی خاتون دوست مبینہ طور پر جائے وقوعہ سے بندوق ساتھ لے  کر چلی گئی۔

جائے وقوعہ سے ایک خول برآمد ہوا ہے، جبکہ پولیس نے واقعہ کو ‘حادثاتی چوٹ’ قرار دیا ہے۔