تبدیلی نے سیاست میں گند ڈال کر اسے تباہ کردیا: نوازشریف کی عمران خان پر تنقید

 

لاہور ( آئی آر کے نیوز ) سابق وزیرا عظم اور مسلم لیگ کے صدرمیاں نواز شریف نے پی ٹی آئی کو سخت تنقید کا نشانہ بناتے ہوئے کہا کہ کرپشن، معاشی تباہی، مہنگائی اور بدتمیزی ’تبدیلی‘ کی سوغاتیں تھیں۔

رپورٹ کے مطابق پاکستان مسلم لیگ (ن) کے صدر میاں نواز شریف نے وزیراعلی پنجاب مریم نوازشریف کے ہمراہ اراکین پنجاب اسمبلی سے ملاقات کی ہے۔ اس ملاقات میں پنجاب بھر سے مسلم لیگ ن کے اراکین اسمبلی نے میاں نواز شریف سے ملاقات کی۔ ساہیوال، خانیوال، ملتان ، لودھراں، وہاڑی اور بہاول نگر ڈویژن سے تعلق رکھنے والے ارکان پنجاب اسمبلی نے اس اجلاس میں شرکت کی۔

نواز شریف نے ارکان اسمبلی سے گفتگو کرتے ہوئے کہا کہ  بدقسمتی ہے کہ ترقی کرتا ملک پٹڑی سے اتار دیا گیا، سیاست میں گند ڈال کر اسے تباہ کیا گیا، بد تہذیبی، بدتمیزی ،بغض اور انتقام کوسیاست بنادیا گیا۔

انہوں نےملاقات میں مزید کہا کہ  آئی ایم ایف واپس آنے سے پالیسیوں میں تسلسل آئے گا جس سے معاشی ترقی یقینی ہوگی۔ کرپشن، معاشی تباہی، مہنگائی اور بدتمیزی ’تبدیلی‘ کی سوغاتیں تھیں۔

 میاں نواز شریف نے اجلاس میں دعویٰ کیاکہ ہم نے آئی ایم ایف کو خدا حافظ کہہ دیا تھا، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں۔

ارکان اسمبلی نے گفتگو کرتے ہوئے میاں نواز شریف نے کہا کہ پاکستان کا بچہ بچہ جانتا ہے کہ پاکستان میں سب سے زیادہ کام کس نے کیا ہے۔ انہوں نے مزید کہا کہ بہت سے تکلیفیں برداشت کیں پگر پاکستان کے ساتھ وافادار رہے اور عوام کی خدمت جاری رکھی۔ پاکستان کے چپے چپے پر نوازشریف اور شہبازشریف کی ترقی کے نشان موجود ہیں۔ 

نواز شریف کا کہنا تھا کہ وزیراعظم شہباز شریف نے پاکستان کے معاشی استحکام کے لیے 'شہباز سپیڈ' سے کام کیا ہے، وزیراعظم شہباز شریف کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا، مریم نوازنے نوازشریف اور شہبازشریف کے دور کی یاد تازہ کردی ہے۔